صحنِ مقتل کو جو سجدوں سے سجا دیتے ہیں
سلام
صحنِ مقتل کو جو سجدوں سے سجا دیتے ہیں
خوں کے ہر قطرے کو تاریخ بنا دیتے ہیں
یوں بھی اربابِ وفا دادِ وفا دیتے ہیں
شمع بجھتی ہے تو دل شمع جلا دیتے ہیں
اُمّتی یُوں بھی رسالت کا صِلا دیتے ہیں
گھر جلا دیتے ہیں قرآن جلا دیتے ہیں
ذکرِ شبّیرؑ ہے خُود وقت کے ہونٹوں کی پُکار
ہم تو آواز میں آواز مِلا دیتے ہیں
نصرتِ دیں کو بُلاتی ہے جب آوازِ اِمامؑ
بچے لبیک کی جُھولے سے صدا دیتے ہیں
کربلا والوں کا اندازِ رضا تو دیکھو
ماں کے لب بچوں کو مرنے کی دُعا دیتے ہیں
رُخِ زینبؑ سے نِگاہوں کو ہٹانے کے لیے
شاہِ دیںؑ نیزے پہ قرآن سنا دیتے ہیں
جب بھی آ جاتا ہے سقائے سکینہؑ کا خیال
بچے سُوکھے ہوئے کوزوں کو گرا دیتے ہیں
بد دُعا جب لبِ زینبؑ پہ تڑپ اٹھتی ہے
طوق و زنجیر کو سجّادؑ ہِلا دیتے ہیں
پانی بچے کے لیے مانگا ہے اب اس کا جواب
دیکھیں لوگ اپنے نبیؐ زادےؑ کو کیا دیتے ہیں
شاعر اہلبیت: کلیم آل عبا سید شاہدؔ نقوی
نوٹ: اہلبیت کی مدح میں کہے گئے کوئی بھی اشعار جو اس ویبسائٹ پر موجود نہ ہوں شامل کرنے کے لئے ہم سے رابطہ کریں۔
Contact us: husainiclips@gmail.com
